ليه يا امي مليون سؤال جوايا
ليه يا امي بتكون تقيله خطايا
وصاحبي ورفيق عمر وصبايا
بيجري ويجري ويسبق دنيايا
... ... ...
ليه يا امي ماسك في ايدي عصايا
وفي قدمي حديد مكبل خطايا
وطريقي طويل ومالوش نهايه
جاوبي يا امي ايه الحكاية
... ... ...
ليه دايما بتداري دموعك
ليه يامي بسمع وجوعك
وبحس ببكاكي ساعة خشوعك
وبسمع دعاكي يامي في ركوعك
... ... ...
ليه يا امي حاسه بهزيمة
وفي صوتي يا امي نبرة حزينة
وقلبي يامي خايف معايا
جاوبي يامي ايه الحكايه